Вести
Успешна обука за зајакнување на капацитетите на советодавците за квалитетни почвени податоци
Во петокот, 08.05.2026, на Факултетот за земјоделски науки и храна – Скопје (ФЗНХ), АПРЗ во рамките на проектот CARBONICA организираше стручна обука на тема „Методологија и теренско земање почвени примероци за анализа на органска материја и органски јаглерод (SOC) во почвите“. На обуката присуствуваа 30 советодавци од сите региони на Македонија, кои стекнатите знаења ќе ги применуваат во секојдневната работа со земјоделците.
Обуката ја отворија и со поздравни обраќања ја поддржаа м-р Пеце Стојковски, директор на АПРЗ, и проф. д-р Миле Маркоски, декан на ФЗНХ. Нивната водечка улога и поддршка беа клучни за организацијата и успешната реализација на настанот.
„Со јасна визија и силно партнерство помеѓу практиката и науката, обезбедуваме конкретни решенија за земјоделците — подобри податоци, поцелисходни совети и поголема отпорност на фармите.“ истакна директор на АПРЗ м-р Пеце Стојковски.
„Преку практични вежби во лабораторија и на терен ги пренесуваме научните методи во секојдневната работа на советодавците, што директно придонесува за квалитетот на почвите и добробитта на земјоделците.“ — проф. д-р Миле Маркоски.
Теоретско освежување
Одличното предавање на проф. д-р Татјана Миткова, придонесе учесниците да се запознаат со значењето и улогата на органската материја и органскиот јаглерод во функција на одржливо земјоделство, врската помеѓу органската материја и плодноста, како и основните почвени параметри (pH, текстура, CEC).
Лабораториска демонстрација
Во акредитираната лабораторија при ФЗНХ учесниците преку директна демонстрација се запознаа со:
- Подготовка на примероци (сушење, сеење, хомогенизација)
- Методи за определување на SOC
- QA/QC процедури (дупликати, стандарди)
- Преглед на лабораториска опрема
Од теорија кон пракса
Суштинскиот дел од оваа обука беше теренскиот практичен дел што се одржа на опитните полиња при ФЗНХ. Учесниците имаа можност практично да се запознаат со:
- избор на локација и стратификација
- земање почвени примероци со сонда и лопата
- составување композитни примероци
- геореференцирање со GPS
- опис на почвен профил и правилно обележување и пакување на примероци
Зошто оваа обука е важна
- Соработка меѓу науката и теренот: Активната вклученост на ФЗНХ и водечката улога на АПРЗ ја демонстрираа вредноста на партнерството кое ги поврзува научните капацитети со практичните потреби на земјоделците.
- Подигање на капацитетите на советодавците: Комбинацијата од теорија, лабораторија и практичен теренски тренинг им обезбеди на советниците конкретни вештини за стандардизирано земање и документација на примероци, што ја зголемува точноста и следливоста на податоците.
- Директен бенефит за земјоделците: Подобрените и доверливи податоци за органска материја и SOC овозможуваат поцелисходни препораки за управување со почвите — резултат кој ќе го почувствуваат земјоделците преку повисока продуктивност, подобрена плодност и зголемена отпорност на климатските промени.
Следни активности
АПРЗ ќе продолжи со пренос на стекнатите знаења кон пошироката мрежа на советодавци и земјоделци, вклучително и интеграција на резултатите со алатките од проектот CARBONICA за поддршка на одлуки на терен. Очекуваме дополнителни обуки и демонстрации во текот на годината за да се обезбеди континуирана поддршка и практична примена.







